កុំខ្ជិលកុំល្ងង់ពេក ខំរៀនលេខរៀនអក្ខរា
រៀនគ្រប់សព្វធម៌អាថ៌ ប្រាជ្ញាផ្សំនឹងគំនិត ។
កំណើតកើតជាមនុស្ស មើលឲ្យធ្លុះទោះឆ្ងាយជិត
ចេះស្ទាត់ប្រាកដពិត គិតការអ្វីបានគ្រប់យ៉ាយ ។
មនុស្សល្ងង់មិនផ្អើលភ្ញាក់ ដូចភ្នែកខ្វាក់ទាំងសង្ខាង
មានរូបគ្មានអ្វីអាង សាងទាបថោកកើតកមខ្លៅ ។
ពូជមនិស្សទោះខ្ពស់ទាប កើតតាមភាពត្រកូលផៅ
អាក្រក់ល្អសខ្មៅ កើតកូនចៅដូចដូនតា ។
កំណាព្យលោកតាក្រំងុយ
ចង់ធំខំពីតូច បើខ្លាចខូចកុំឆាប់ខឹង
ការធើ្វឲ្យចេះថ្លឹង កុំប្រឹងជុះតាមដំរី ។
កុំចង់ខ្ពស់ហូសមេឃ កុំឱនពេកអាប់រាសី
ទោះដើរនិយាយស្តី លៃឲ្យល្មមតែគួរសម ។
យល់ឆ្ងាយកុំណាយគិត ទោះយល់ជិតកុំអាលខំ
មិនជាក់មើលឲ្យចំ ក្រែងច្រំឡំសជាខ្មៅ ។
ទម្លប់ធំជាងច្បាប់ បើរៀនត្រាបកុំត្រាបខ្លៅ
ត្រាប់ប្រាជ្ញអាចប្រដៅ ស្តីកូនចៅស្តីឲ្យស្មោះ ។
កំណាព្យលោកតាក្រំងុយ
កុំឆ្មើងអាងបុណ្យ ស្រដីឲ្យទន់ ពោលពាក្យពីរោះ
ខ្លួនអ្នកនឹងថ្លឹង នឹងឡើងសក្តិយស់ កុំឆ្លៀតនាំឈ្លុះ
ញុះញង់អ្នកធំ ។
កុំស្អប់អ្នកតូច បើឃើញគ្នាខូច គួរគិតប្រមុំ
ទោសគ្នាតិចតួច ផ្តួចចឡើងជាធំ ផ្សេងពូតជាដុំ
ផ្លុំឆេះជាភ្លើង ។
កុំភ្លើនភ្លេចខ្លួន ចេះសាសន៍ចិនយួន កុំចោលខ្មែរយើង
កុំធ្វើក្រអើត កុំពើតកុំពើង កុំពាក់ស្បែកជើង
ចូលវត្តលោកសង្ឃ ។
កំណាព្យលោកតាក្រំងុយ
បើចង់ស្រាលខ្លួន ខំរៀនឲ្យមួន ឲ្យមាំឲ្យស្ទាត់
កុំចេះស្ទាក់ស្ទើរ ល្ងីល្ងើឥតបទ បើចេះប្រាកដ
ប្រាក់រត់តាមហៅ ។
កុំថ្នមកម្លាំង កាប់ជីកចូកចាំង កុំថារងារក្តៅ
រៀនអ្វីឲ្យឆ្អិន កុំឲ្យខ្លោចឆៅ កុំដេកតែខ្លៅ
ក្រក្រៅសណ្តាប់ ។
បើល្ងង់ឲ្យចេះ រៀនរកតម្រិះ រិះរកតម្រាប់
ឥន្រ្ទិយឆ្វេងស្តាំ កុំចាំគេប្រាប់ រៀនស្តីរៀនស្តាប់
រៀនមើលឲ្យស្តែង ៕
No comments:
Post a Comment